عمران خان کے خلاف سپریم کورٹ میں توہین عدالت کیس سماعت کے لئے مقرر
چیف جسٹس پاکستان عمرعطا بندیال کی سربراہی میں5 بھی رکنی لارجر بنچ کل سماعت کرے گا
(ٹوٹل میگزین )

17/11/22

سپریم کورٹ میں عمران خان کے خلاف توہین عدالت کیس سماعت کیلئے مقرر کردیا گیا، عدالت عظمیٰ نے مقدمے کے فریقین کو نوٹس جاری کر دیا۔ میڈیا رپورٹس کے مطابق سپریم کورٹ آف پاکستان میں چیئرمین تحریک انصاف عمران خان کے خلاف توہین عدالت کیس سماعت کیلئے مقرر کردیا گیا ہے، چیف جسٹس عمر عطا بندیال کی سربراہی میں5 رکنی لارجر بنچ کل سماعت کرے گا، جسٹس اعجاز الاحسن اور جسٹس مظاہر علی اکبر نقوی بنچ میں شامل ہوں گے، جسٹس منیب اختر اور جسٹس یحییٰ آفریدی بھی لارجر بنچ کا حصہ ہیں۔
گزشتہ روز چیئرمین پاکستان تحریک انصاف عمران خان نے توہین عدالت کیس میں سپریم کورٹ میں جواب جمع کرا یا تھا، جس میں عمران خان نے کہا کہ جانتے بوجھتے ہوئے سپریم کورٹ کے حکم کی عدولی نہیں کی گئی، یقین دہانی کراتا ہوں مجھے 25 مئی کی شام عدالتی حکم سے آگاہ نہیں کیا گیا، سپریم کورٹ نے حکم میں بابر اعوان کی مجھ سے ملاقات کرنے کا بھی کہا، عدالتی حکم کے باجود انتظامیہ نے ملاقات میں کوئی سہولت میسر نہیں کی، 25 مئی کو پونے 7 بجے کارکنان کو دیا گیا ویڈیو پیغام سیاسی معلومات پر جاری کیا گیا، احتجاج کے دوران جیمرز کی وجہ سے فون کے ذریعے رابطہ نا ممکن تھا۔

اپنے جواب میں سابق وزیراعظم نے بتایا ہے کہ نادانستہ طور پر اٹھائے گئے قدم پر افسوس ہے، 25 مئی کو ڈی چوک جانے کی کال دینا حکومتی رویے کے خلاف پرامن احتجاج کے لیے تھی، سپریم کورٹ میں زیر التوا کیس میں شامل ہونے کو نہیں کہا گیا، مجھے اب بتایا گیا ہے کہ اسد عمر نے جی نائن گراؤنڈ کے حوالے سے ہدایات دیں۔ واضح رہے کہ سپریم کورٹ آف پاکستان نے 25 مئی کے واقعات سے متعلق توہین عدالت کیس میں عمران خان سے ہفتے تک جواب طلب کیا تھا۔
مزید پڑھیں

Previous post سردی کی شدت میں بہت اضافے کا امکان ہے<br>پاکستان میں کل بارش اور برفباری ہونے کی پیشن گوئی<br>(ٹوٹل میگزین )<br>14/11/22
Next post حقیقی آزادی مارچ کا پڑاؤ فیض آباد میں ڈالنے کا قوی امکان